陈妈妈（以下俱曲白间用）
陈家妈妈有人缘，风月场中走子几呵年，（白）小阿奴奴名头虽然人尽晓得，只弗知我起先个族谱相传，我出身元是湖州个大细，当初跟随子识女天仙，弗匡道沉埋，得我更个凌替，吃个姐儿扯到身边，淹流到那间个时节，弄得我忒弗新鲜，我先前是红娘子结亲时挂歇个星锦帐，又是绿衣郎登科时穿旧个星蓝衫，到如今再捉我做子被头里个抹布，常搭我风流所在去缠绵，湿时节好像海蜇个风味，乾时节像荷叶样个蓝班，绉瞒瞒像厨司公汤碗里个紫菜，腌达达咦像湖广客人盐酱筒里烂丢丢个星鱼乾，撞着子新做亲介星顽皮精姐姐，日夜捉我搭来拈弄，遇着子私窠子会搂打个星娘娘，也弗住介累得我腥膻，壮罗多，油碌碌，新出笼馒头能个样物事，在上游了游，到有星滋味，骨棱层，瘦乖乖，霍在肉上个样东西在上缴了缴，再惹得我介兹腌，有介骚离离掀格腊个样寡妇，时常捉我扌老扌老，又有个极妖娆最风趣个样尼姑，尽捉我来牵牵，黑松林底下我弗知看子若干个光景，肚家场当中也吃我游玩得子介千千，玉门关上周回四遭替渠个巡哨，毛将军玉柱上头下头也替渠着根介周旋，双膀弯里我常常在搭风流飘荡，笼须席底下也吃我困得介安闲，个星轻薄後生见面弗得介捉我取笑，我笑渠无我了你湿搭搭冉阝得介安眠，独吃湖州亲眷常来替我合嘴，亏杀子汤家姐姐替我合得人缘，冉阝间我里情哥赠我介只曲子，你侬替我唱搭去宣宣，（皂罗袍）妈妈从来堪羡，伴佳人才子暮寝朝眠，任他结下好姻缘，遇咱才卸得相思担，色非红紫，香非麝阑，合欢帐里，鸳鸯枕边，论功劳咱是个亲篾片，（歌）我吃个淹润着人了还子多少风流债，雨散云收做一团。
门神
结识私情像门神，恋新弃旧忒忘情，（白）记得去年大年三十夜，捉我千刷万刷，刷得我心悦诚服，千嘱万嘱，嘱得我一板个正经，我虽然图你糊口之计，你也敬得我介如神，我只望替你同家日活，撑立个门庭，有介一起轻薄後生捉我摸手摸脚，我只是声色弗动，并弗容介个闲神野鬼，上你搭个大门，我为你受子许多个烹风露水，带月披星，看破子几呵个檐头贼智，听得子几呵个壁缝里个风声，你当先见我颜色新鲜冉阝亨介喝彩，装扮得花噪加倍介奉承，冉阝间帖得筋皮力尽，磨得我头鬓蓬尘，弗上一年个光景，只思量别恋个新人，你看我弗像个士女，我也道是你弗是个善人，就要捻我出去，弗匡你起介一片个毒心，遇着介个残冬腊月，一刻也弗容我留停，你拿个冷水来泼我个身上，我还道是你取笑，拿个筅帚来支我，我也只弗做声，扯破子我个衣裳只是忍耐，扌赖破子我个面孔方才道是你认真，我吃你刮又刮得介测赖，铲又铲得介尽情，屈来，我吃你介场玖刮了去介，你做人忒弗长情，我有介只曲子在里到唱来你听听，（玉胞肚）君心忒忍，恋新人浑忘旧人，想旧人昔日会新，料新人未必常渐，人有日变初心，追悔当初弃旧人，（歌）姐道我个郎呀，冉阝间我看你搭大门前个前船就是後船眼，算来只好一年新。
鞋子
姐儿生来鞋子能，身上花苗颜色精，吃个搭袜缠个情，郎看见子我，整日在面前引了引，（白）引了引，引了引，一日里上子我大门，渠见子我迷花笑眼，我听渠说话也到知音，惊我松江尤墩衬里，外盖绸段簇新，爱我口儿紧括，喜我浅面低跟，又弗比靴头样绕嘴绕脸，又弗像急棚棚个样河豚，也弗论价钱多少，开子银包便称，当时成子交易，对合着袋子了就奔，一走走到半路，我自家肚里踌论，看子後生十分像意，弗知冉阝亨个家门，原来是好人家脚气，弗是个样打弗穿个脚跟，厅堂才是平洋洋个砖地，房里又是光滑滑个地平，我指望搭渠一夫一妇，得知先有子四个冤魂，陈桥阿妈见子我一歇上头笃嘴笃脸，荡口娘娘见子我努眼凸睛，西山头姨姨看见子我乡谈弗绝，六葱姐见子我市语连声，一个说我浆丢头个迟货，一个说我还复个弗是真身，一个说我客料比弗得松江个有趣，一个说我一出货到弗得南京轿夫营个绝精，我受子介番批点，气子一个黄昏，且耐过子今夜，看大官人明朝冉阝捉我看承，巴得大天白亮，只听得<门平>々响介敲门，再是三兄四弟拉我里官人去游春，听听我里个说道要带我同走，慌忙随子渠子起身，到处游山玩景，弗会离个脚跟，我只道一生之事，匡弗大长情，弗管天晴雨落，捉我乱步乱奔，兼之黄昏早晚，丢丢丢丢弄得我溥嘴溥面蹭跟，旧时捉我做出人前卖俏个妆扮，冉阝间捉我做个通房拖脚看成，冷清清踏板上好一分无兴，耍来头现在渠搭四个冤魂个眼睛，我吃忍气弗过，唱只曲子来你听听，（驻云飞）我是绸绢通身，举步生风前後云，里外多帮衬，行动都齐整，茶，只为足下欠真诚，脚斜不正，弄得我头绽跟穿龌龊无乾净，如今个弃旧怜新恼杀人，骂你胡行老脚跟，（白）郎君听得子个只曲子，床上一个番身，会，你正弗说家自弗是，到骂我弃旧怜新，你当初精精致致，冉阝间乌卓泥经，当初光头滑面，冉阝间毛头精形，且没说你多呵弗好，就是你唱个只曲子阿一介难听，你冉阝弗学六葱介省事，西山介俭纯，冉阝弗学荡口介细腻，陈桥介老成，你既是冤家三扌赖四，还你介个整旧如新，只见明朝叫住子介个镇江皮匠，打子四个个子两个硬跟，拿我准来渠子，挑子我了行程，一拎拎我在箩头里子，我思量个一出去也无造化做个娘子夫人，跟子皮匠鞋是肩挑步担，一夫一妇死也甘心，细皮兰切将就过子日子，只要匾担同心，得知个个臭贼囤子里贩卖，原来介出整旧如新，热汤捉我洗洗，也是个道理，冷水没头介一淋，石块能介个宜头，对子我肚里一塞，硬板刷擦得我性命难存，连锤再锤锤得我介要紧，只苦得三尺麻绳，反匠听得子我说又道是我怨命，倒转子宜头一连七八击打得我消魂（歌）奉劝姐儿没要自道是脚力大，就是拖脚蒲鞋还胜子左嫁人。
吴语再财醮曰左嫁人，左，俗音际
镬子
姐儿生来镬子能，一生口厂也无心，吃个木头能介个家公差配子我，整日教我闷闷昏昏气杀子人，（白）气杀人，气杀人，也无早起无黄昏，压紧子我，弗放番身，有时拿我动火，热炊炊炊也再有趣，杀子火，依先教我冷冷清清，大鱼大肉拖来便油脂膈腻介是我周捉，我何会下口介一星，喇达了头个跗龌龊也倒耐子，馊酸个阿婆辞劳一发难听，过日子你搭多烧子介一把了烧子个饭滞，倒说我馋痨了要吃，前月个做分子烧难为子柴火，咦道是我蛮皮了弗替你搭当心，我里阿公道是费柴费火了略拿个灰钯来动得介一动，你搭合家门一歇上底就彳彳亍亍吓出子我精魂拿使我掇出子门槛，推倒在庭心，拿个热铁铲来起子我介七八个耳光，刮镬钯来打子我十数击背心，钹我搭转来兜嘴介两撞，又弗容我汪气汪声，我便火闸闸子介一昼，就是一杓冷水捉我浑身介一淋，我吃子更介铲刮修削，教我冉阝亨存身，我思量整日在厨房下转过子个日脚，何会见个光景，踏尽子灶前灰了冉阝得有个超升，我那间吃气弗过，生子介个肚漏，身体热了又烧破子嘴唇，补药吃来无用，看看性命难存，屈来灶君菩萨，嗄到子介个田地，还弗容我安宁，过子年三十夜，拿到圆炉上当个火盆，咦要我支持拜节个茶汤茶水，咦要我照管个男儿大细个点心，一到子正月半，你搭受子个零碎银子，咦要来我身上煎介个煎饼，你搭自弗小心，吃个白日撞偷子物事，你再去请子个天地，扎子个草人，{山米}子个黄豆，也来打个奴身，打得百践粉碎，折开子我个盖老，卖来别人，换子一个汤罐，倒找子渠银子三分，上子野蛮子个担上，一挑挑出子阊门，（黄莺儿）挑出冉阝阊门，上新桥望北行，冶坊浜里家居近，姓王近村，三代有名，家中大小多得甚，细详论，指望一夫一妇，原来靠此做营生，（歌）安我来粪箕里一丢丢子我来炉里去，依先入子个火坑门。
烧香娘娘
春二三月暖洋洋，姐儿打扮去烧香，（白）乡下人一味老实，城里人十分介轻狂，屋里精无一塌，硬三蛮极要行，便去央求对门知心妈妈，又央求隔壁着意个娘娘，请你来再无别事，有一句知心话替你商量，我从小许子穹窿山香愿，至今还弗会去了偿，昨夜头偶然得介一梦，三茆菩萨派我灾殃，冉阝间我要还还个心愿，百无一有难行，头上少介两件首饰，身上要介几件衣裳，家公便道娘呀，目下无柴少米，做生意咦介无赚处个孔方，春季屋钱要紧，米钱又无亻奢抵当，烧香虽则是个好事，算来要费介二钱个放光，姐儿听得子个句说话，心火爆出子个太阳，天灾神祸骂子几句，乌龟亡八也骂子千万百声，抬儿凳只听得霹雳拍拉，碗定盏壶瓶流水倾匡，（猫儿坠）天灾神祸，打你大巴掌，谁许你胡言乱主张，我今立意要烧香，无状，再开言，教你满身青胖，（白）姐儿凶似老虎，家公奔似山獐，吓倒子对门个妈妈，踏痛子隔壁个娘娘，两人百般介解劝，听我说个衷肠，玉帝也弗离个金殿，闺女也弗出个绣房，官人也是做人家个说话，并无半句派赖个肚肠，（桂枝香）听奴说诉，非奴之过，只因亡八无知，致使我心中发怒，把从前细数，从前细数，与他多年夫妇，几见他撑持门户，尽亏奴，若不去还香愿，非为女丈夫，（白）姐道娘娘呀，无奈何，头上嵌珠子天鹅绒云髻，要借介一个，芙蓉锦绫子包头借介一方，兰花头玉簪要借一只，丁香环子借介一双，徐管家娘子有一个金镶玉观音押鬓，陈卖肉新妇有两只摘金桃个凤凰，张大姐有个涂金蝴蝶，李三阿妈借子点翠个螳螂，四个铜钱替我卖条红头绳扎子个螺蛳，饶星鹿角菜来刷刷个鬓傍，讨一圆香圆肥皂打打身上，拆拽介两根安息香熏熏个衣裳，头上便是介个光景，身上冉阝亨商量，借介件绵绸衫桃红夹袄来衬里，外头个单衫，弗拘荸桃青或是柳黄，花绸连裙洒线披风各要一件，白地青镶靴头鞋对脚膝裤各要一双，再借一付洗白脚带，一发称副子个衣裳，两人听得吃生能介一笑，弗匡你介忒要风光，（驻云飞）上告娘行，借物虽多尽净妨，感你多情况，教我难推让，茶首饰共衣裳，管教停当，事事俱完，免挂心儿上，明日安心去进香，（白）姐儿道个档也算来是个小事，我先脱个小衣裳洗洗浆浆，打发两人转背，就央个姑妈外甥，收捉铜杓注子两件，同两领补打个衣裳，替我拿来典当里去当当，买停当子纸马牙香，蜡烛要介两对，还要介一块千张，{山米}子三升白米，明朝煮饭，一箍松箍今夜烧子个浴汤，兑介钱半八成银子，还个船轿，换介三十新铸铜钱，我打发个叫化个婆娘，色样一齐完备，明朝打点早行，（懒画眉）娇娘早起拂装台，炭画蛾眉粉弹腮，只愁装不就好身材，画情把衣筛来穿戴，且喜得人爱肯借来，（白）梳装打扮完备，摇摇摆摆下子船舱，船家嘴里也再弗说，肚里千思百量，若能替渠歇介一夜，再贴渠介五钱个放光，（皂罗袍）好个风流气象，看不肥不瘦，不短不长，端端正正坐船舱，时兴衣服乔装扮，粉香脂气，分明是麝兰，娇音细语，分明是凤凰，只听得唤一声家长，使我魂飘荡，（白）船一摇摇到木渎，轿夫斗夺来担，姐道众人也弗要皂，听我说介个主张，轿钱还你一钱银子，依我处处要行，先到穹窿山还子香愿，後到玄墓山看看假山轻堂，转来要到天池看看石殿，再到一云徐家坟上张张，还要看金山寺里坐关个和尚，天平山看看范文正公个祠堂，前头老实个轿夫道我也无个样气力，後头闪出两个轩腊个後生，便道轿钱也弗敢多要，路上便要吃介两遭个酒浆，等我抬你满山兜，便奉承你星气力，你也弗要慌忙，姐儿坐子轿子装模做样，引动了多少个後生，有个道是出乡个观音菩萨，有个道是抄化个陈州娘娘，（香柳娘）这抬来女娘，这抬来女娘，身材停当，乡村冉阝得神仙降，怎禁他这巧妆，怎当他这俏妆，只少个小红娘，莺莺无两档，看蜂喧蝶嚷，看蜂喧蝶嚷，到处生香，令人妄想，（白）看看日头落子，姐儿肚里又介心慌，夜晚头边有星走失，借别人介多呵物事，教我拿亻奢陪偿，慌忙赶到屋里，撞着子多呵个婶娘，说弗尽路上个景致，话弗了山上个风光，只听得大门呀生能介一响，再是讨衣裳个阿妈娘娘，慌忙头上除下子首节，身上卸落子衣裳，两人抬头一看，满身剥得精光，（歌）方才金光参殿，像个常熟山上新装塑个尊观音佛，冉阝间破珠ソ撒，好像个盘门路里并乌龟算命星臭婆娘。
破踪帽歌
有介一只山歌唱你侬听，新翻胜打扮弄聪明，（白）也弗唱蒲鞋毡袜，也弗唱直掇海青，也弗唱绢裙绫，也弗唱香袋汗巾，单题唱个头上帽子，历代几样翻新，旧时作尖顶长号，後来改子平顶鼓墩，咦有缨子朗锁密结瓦棱，惟有小张官人头上帽子戴又戴得个停当，盔又盔得介娉婷，光油油露出子杭州丫髻，亮晃晃插起重庆金簪，後头抻出子双螭虎圈子，前头推起子九针子网巾，帽子带得介长远，年深月久成精，忽朝一日头上说话，叫声小张官人，我一跟跟你两三巡黄册，你一戴戴我二三十个清明，春秋四季并弗会盔顶丝罗帽，寒冬腊月并弗会盔顶绒帽毡巾，总成你相交子多少姹童窠子，陪伴子若干蓝生举人，看子多少提偶扮戏游湖踏青，唱船里人中显贵，酒楼上闹里夺尊，捉个猪胆去油，教我受子多少淹赞苦恼，捉个百药箭上色，教我吃子多少乌皂泥筋，板刷常常相会，引线弗会离身，一日子修理得介停当，戴出子阊门，月城里遇着子朋友说话，聚集子东西来往无数个闲人，看呆子山东贩踪侉子，立痴子江西贩帽子个客人，江西老乡谈弗绝，苏州歇後语边声，十字街蟒龙玉乌纱冠石皮得介测癞，老弗识波罗生荔枝圆重夕得介忒村，日头照子好像走差次身头上草帽，雨落湿子好像压匾介一个老人头巾，捻求手里好像拳紧介一只偷瓜蝎，落来地上好像矗起来介一只刺毛莺，修踪帽见子一吓，洗网巾吃子一惊，破靴羊毛换铜钱缉三问四，卖花换眢豆弗会离门，小张听得几句言语，吓得冷汗直淋，立来无人烟所在，探下来看介一看，真当弗像，只得去贴旧换新，欲要黄帽铺里去讲讲，咦弗好戴子进渠大门，思量无些摆布，只得冉阝借子一顶麻布头巾，绉漫漫好像看坟个董水，软搭搭好像丁忧个洞宝，遇着子承天寺里个和尚，定请渠领丧，入木，撞见子玄妙观里道士，定道请渠退煞，念经，乡邻赶趁子分子，朋友怕阙子人情，小张道个是我里踪兄便服，弗消得到列位介费心，无些意思介一日，只得走转家门，家婆道你出去子介一日，阿会干子帽子个正经，咳，家婆，弗要话起，走肿子个脚底，擢痛子个背心，饿过子个肚里，看花子个眼睛，帽铺家家走到，价钱个个弗等，只得反渠转来假充一个朗锁戴戴，到下桥行市再寻，弹忒子龌龊吹忒子个灰尘上子盔头盔介一盔，屈刚盔子三五六星，小张挞胸跌脚，说道弗匡你介一个收成，家婆道你也弗要大惊小怪，还干若干正经，大块头儿改变凉鞋着着，斜块头儿改子外公头一束包巾，帽沿拿来做个扎额，我里夏天恍恍，碎块头儿做子一顶细密网巾，鬃头鬃脑做个刷牙来刷刷，零零碎碎做个香袋薰薰，帽子道我前世作尽子扯孽，你公婆两个摆布得我介尽情，小张道踪兄大哥，帽子大人，你侬弗要出言吐气，我侬唱介一只曲子你听听，（驻云飞）帽样新鲜不复完，今剩缺连，一向承装观，今日堪埋怨，茶戴你不多年，帽子道尽勾你哉，如何稀烂，想是当初，修旧将咱骗，为你冤家费我钱，（白）帽子道鼓弗打弗响，钟弗撞弗呜，别人戴子风里坐，你戴子我雪里奔，凭你改长改短，我也无怒无嗔，捉我改子外公头上束发包巾，我也感承你顶戴，捉我改子你家婆头上扎额，我也当得奉承，（歌）捉我改子刷牙正要擢你臭贼个张嘴，捉我改子凉鞋正要打碎你个老脚跟。
游翰琐言尚有破毡袜歌，无味，故不录
山人
说山人，话山人，说着山人笑杀人（白）身穿着僧弗僧俗弗俗个沿落广袖，头带子方弗方圆弗圆个进士唐巾，弗肯闭门家里坐，肆多多在土地堂里去安身，土地菩萨看见子，连忙起身便来迎，土地道呸，出来，我只道是同僚下降，元来到是你个些光斯欣，咦弗知是文职武职，咦弗知是蓝生举人，咦弗知是粮长升级，咦弗知是从书老人，咦夷来里作揖画卯，咦弗来里放告投文，耍了闹哄哄介挨肩了擦背，急逗逗介作揖了平身，轿夫个个侪做子朋友，卓隶个个侪扳子至亲，带累我土地也弗得安静，无早无晚介打户敲门，我弗知你为亻奢个事干，仔细替我说个元因，山人上前齐齐作揖，告诉我里的的亲亲个土地尊神，我哩个些人，道假咦弗假，道真咦弗真，做诗咦弗会嘲风作月，写字咦会带草连真，只因为生意淡薄，无奈何进子法门，做买卖咦吃个本钱缺少，要教书咦吃个学堂难寻，要算命咦弗晓得个五行生克，要行医咦弗明白个六脉浮苛，天生子软冻冻介一个担轻弗得步重弗得个肩膊，又生个有劳劳介一张说人话人自害自身个嘴唇，算尽子个三十六策，只得投靠子个有名目个山人，陪子多少个蹲身小坐，吃子我哩几呵煮酒馄炖，方才通得一个名姓，领我见得个大大人，虽然弗指望扬名四海，且乐得荣耀一身，吓落子几呵亲眷，耸动子多少乡邻，因此上也要参参见佛，弗是我哩无事入公门，土地听得个班说话，就连声骂道个些窍说个猢狲，你也忒杀胆，大，你也忒杀恶心，廉耻咦介扫地，钻刺咦介通神，我见你一进一，出袖子里常有手本，一个上一个落，口里常说个人情，也有时节诈别人酒食，也有时节骗子白金，硬子嘴了了说道恤孤了仗义，曲子肚肠了说表道兄了舍亲，做子几呵腰头彳悉擦，难道只要闹热个门庭，你个样瞒心昧已，冉阝瞒得灶界六神，若还弗信，待我唱只驻云飞来你听听，（驻云飞）笑杀山人，终日忙忙着处跟，头戴无些止，全靠虚帮衬，杀口里滴溜清，心肠墨锭，八句歪诗，尝搭公文进，今日胥门接某大人，明日阊门送某大人，（白）山人听子，冷汗淋身，便道土地，忒杀显灵，大家向前讨介一卦，看道阿能勾到底太平，先前得子一个圣笤，以後再打子两个翻身，土地说道在前还有青龙上卦，去後只怕白虎缠身，你也弗有消求神请佛，你也弗消得去告斗详星，也弗消得念三官宝诰，也弗消得念救苦真经，（歌）我只劝你得放手时须放手，得饶人处且饶人。
此歌为让诮山人管闲事而作，故末有放手饶人之句，或云张迫起先生作，非也，盖旧有此歌，而伯起复润色之耳。
鱼船妇打生人相骂
网船上婆娘童子打生个人，一场相骂闹淫淫，你一声来我一白，也弗输来也弗赢，（白）也弗赢，忒好听，只见个个婆娘参起来叫四邻，便骂道你个丢丢响个乌蝇弗要走子去，也搭你搂一个六江水也浑，论起行户中间来我搭你芦上芦下，称起骨头来称八两我半斤，看得别人便是头娘娘能介一点，自家便癞虼巴并进子天平，别人道是善善善，倒是鳅篮里拣出来个一张嘴，呵呵呵再是个旱渴精，突出子个双田螺头个眼睛，久惯要是介了甲戟诈。开子张鲇鱼剌达嘴，只要吃别人星，没得又弗吃你一网兜子，终弗然撑开子船头弗成，得知老娘是个突鲫个相骂嘴，阿呀呀，气得我个肚皮再像子清明前个河豚，我弗像你搭吊带皮个妹子能介弗收管个两脚蚌，也弗像你当黄尝嘴家婆能介{鼻邕}臭鳝能，当面前吃别人骂绝子个团鱼鳖背，背後吃别人挖尽子螺蛳窟臀，你个样正叫子田鸡乾，骨里臭，也要伸出子乌龟头做耍人，打生个气得肚膨气胀，便骂道你个个鹆录鸱个讨人，一张嘴尝是鸦飞鹊乱，久惯是牛皮乌斤，面皮便野鸡斑起，白票手个双眼睛，连番要做个火老鸦，人人叫你是个白鹞鹰屎你也弗曾经我介一弹，弗怕你飞上了青云，等我送得你鹊庭直出，眼见得你搭家公寒章鸡能，我弗怕你搭一窠罗个十姊妹，也弗怕你搭鹞鹰头鹘子眼个星小贼精，你再怪鸟能介捉人冲撞，笑你斑鸠教鹁鸪弗看自个绒形，凭你连夜磨尖子鸭嘴，里思量天鹅肉来吃星，别人家个婆娘穷做穷乾啾啾缩在窠里，并弗会饣舌臀鸟能介着处奔奔，又弗是你撒食养来搭个，冉阝了要你鸟说胚介撒村，等我夹子个张毛鹁鸪看介，你个档雌鸡啼只做个人家弗成，两个相骂子介一画，聚集子两边两岸无数个闲人，指头大个碎囝儿尽夹箝蟹夹，好像野鸭阵飞子介一村，有介一个白头老者喝住子两人，说道弗跳水弗动，见子冤便放个鹰，李家个阿姊你个样参鱼头性格里去使，张家第三个你个个痴鹅头式煞认真，各有道路，各有做人，尽弗消得老鹤跌倒，只捉嘴来撑，冉阝了是介水面上使铁搭摊浪得介尽情，四边田里野鸭落，你也弗去支网，东边港里鱼扶头，你也弗去赶青，又弗是争田夺地，天呀，只问你相骂有耍好听，依我劝开子罢，能我老人家是一派正经，（歌）并弗是羹碗里鱼头拨拨转，支花野味赵谈春。
昔年有赵谈春者，善诙谐，吴语谓没正经日赵，因日赵谈春云。
